Mae ailddatblygiad Theatr Clwyd wedi codi’r swm uchaf gan theatr yng Nghymru bellach ac wedi derbyn y rhodd unigol fwyaf erioed i sefydliad diwylliannol gan Sefydliad Moondance. Mae'r cyfanswm gan ymddiriedolaethau, sefydliadau a dyngarwch preifat bellach yn fwy na £5.3m.

Ymhlith rhai o’r prif roddwyr a’r sefydliadau sy’n dod â buddsoddiad cyllid preifat i Gymru mae Sefydliad Moondance, Sefydliad Garfield Weston, Sefydliad Wolfson, Sefydliad Foyle, Sefydliad Clore Duffield, Ymddiriedolaeth Elusennol Colwinston, Ymddiriedolaeth Backstage a Chronfa Anne Duges San Steffan.

Gan wneud y rhodd breifat fwyaf erioed i sefydliad diwylliannol yng Nghymru o dros £1m, mae cefnogaeth Sefydliad Moondance o Gymru wedi bod yn drawsnewidiol wrth gyflawni gofod newydd sbon ar gyfer cymunedau a phobl ifanc Theatr Clwyd ochr yn ochr â seilwaith hanfodol i leihau ôl troed carbon yr adeilad a’r sefydliad. Bydd y theatr fwy yn cael ei henwi yn Theatr Moondance i ddiolch am y rhodd yma.

Bydd rhodd o £500,000 gan brif ariannwr yn y DU, Sefydliad Garfield Weston, yn sicrhau mynediad i’r celfyddydau i bawb, drwy wella adnoddau creadigol hanfodol. Enw'r ail theatr fydd Theatr Weston. Bydd ystafell bwrpasol i awduron yn cael ei henwi yn Ystafell Awduron Emlyn Williams, ar ôl y dramodydd enwog iawn o Gymru.

Bydd grant Sefydliad Wolfson o £500,000 yn galluogi cyfleusterau o safon byd i bawb ac yn darparu adeilad cynaliadwy drwyddo draw, gyda chyfleusterau cefnogol ar gyfer cenedlaethau’r dyfodol. I ddiolch, bydd y cyntedd pren newydd yn cael ei alw yn Gyntedd Wolfson.

Mae cyfraniad cam cynnar preifat o £500,000 gan ddyngarwyr o Ogledd Cymru
wedi bod yn gatalydd hanfodol yn natblygiad y prosiect a sicrhau cyllid preifat ychwanegol. Bydd mannau chwarae dan do ac awyr agored yn cael eu henwi fel cydnabyddiaeth.

Mae Ymddiriedolaeth Backstage wedi gwneud ymrwymiad o £450,000 tuag at Theatr Clwyd fel adnodd diwylliannol blaenllaw i Gymru a bydd un o’r ystafelloedd ymarfer newydd sbon yn cael ei henwi i’w hanrhydeddu.

Mae Sefydliad Foyle wedi rhoi £407,000 i gefnogi Ystafell Foyle, gofod amlddefnydd hygyrch i gymunedau ac ymwelwyr, gan gynhyrchu incwm hanfodol i gefnogi gwytnwch y sefydliad yn y dyfodol.

Mae Cronfa Dreftadaeth y Loteri Genedlaethol wedi darparu bron i £250k tuag at wneud ein hadnodd cymunedol mawr sydd o bwys pensaernïol a chymdeithasol ac sy’n adeilad rhestredig Gradd II, yn gyfeillgar o ran mynediad am y tro cyntaf, ochr yn ochr â darn newydd sbon o waith ymgysylltu cyhoeddus cynhwysol sy’n cysylltu treftadaeth ddiwylliannol mewn ffordd newydd a chyffrous.

Mae Sefydliad Clore Duffield wedi ymrwymo £100,000 ar gyfer stiwdio Clore Duffield, gofod sy’n ymroddedig i’r gwaith hanfodol ac arobryn yn Theatr Clwyd gyda phobl ifanc, gan ddarparu cyfleoedd i bawb.

Bydd rhodd Ymddiriedolaeth Elusennol Colwinston o Gymru o £100,000 yn ariannu Stiwdio Colwinston, gofod pwrpasol ar gyfer plant a phobl ifanc agored i niwed.

Gan alluogi allgymorth ledled Gogledd Cymru, mae Stiwdio Anne Duges San Steffan wedi cael cymorth o £100,000 o Gronfa Anne Duges San Steffan.

Sicrhaodd Theatr Clwyd £36,905 o Gynllun Cymunedau Treth Gwarediadau Tirlenwi Llywodraeth Cymru, sy’n cael ei weinyddu gan Gyngor Gweithredu Gwirfoddol Cymru (WCVA). Bydd y grant yn cefnogi mentrau gwyrdd a chynaliadwyedd Theatr Clwyd gan gynnwys wal fyw ar yr adeilad, yn cefnogi bioamrywiaeth, ac mae ar gael i’r gymuned gyfan ei mwynhau wrth ymweld â Theatr Clwyd.

Mae’r prosiect hefyd wedi derbyn cyllid gan Sefydliad Abderrahim Crickmay, Ymddiriedolaeth Elusennol Equity ac Ymddiriedolaeth Oakdale.

Mae ailddatblygiad Theatr Clwyd yn un o brosiectau mwyaf arwyddocaol Cymru yn ddiwylliannol. Bydd y prosiect trawsnewidiol yma’n darparu profiad llawer gwell i ymwelwyr, gofod penodol ar gyfer rhaglenni cymunedol ac ymgysylltu, a gwell cyfleusterau cynhyrchu incwm, i gyd mewn adeilad gwyrddach, mwy effeithlon.