Cyfarwyddwyr o Gymru yn arwain ar gynyrchiadau Theatr Clwyd wrth i Dymor y Gwanwyn gael ei gyhoeddi.
See dates and times 25 Hyd 2023
News Story
Mae Theatr Clwyd wedi cyhoeddi ei harlwy ar gyfer Tymor y Gwanwyn heddiw. Gyda'r ailddatblygiad cyfalaf yn cymryd camau breision ymlaen, mae sioeau'n parhau i gael eu cynnal yn Theatr Mix. Bydd Theatr Clwyd hefyd yn mynd â sioeau a gweithgareddau ar draws y sir ac yn teithio Cymru. Bydd y lleoliad yn cynhyrchu tri chynhyrchiad yn ystod y tymor nodedig yma, Kill Thy Neighbour, Constellations and Rope, dan arweiniad tri chyfarwyddwr o Gymru.
Comedi dywyll am gariad, marwolaeth a chyfrinachau cudd yw Kill Thy Neighbour (2-20 Ebr). Mae Caryl a Meirion yn brwydro yn erbyn y pwerau o’u cwmpas ac yng ngyddfau ei gilydd yn eu pentref cerdyn post Cymreig perffaith. Mae eu cymuned yn diflannu ac mae straeon tywyll yn cuddio y tu ôl i’r ffasâd bocs siocled. Wedi’i hysgrifennu gan Lucie Lovatt o Wrecsam, dyma yw ei drama lawn gyntaf. Mae’r sioe hon yn gyd-gynhyrchiad gyda Theatr y Torch, wedi’i chyfarwyddo gan eu Cyfarwyddwr Artistig arobryn, Chelsey Gillard.
Mae Kill Thy Neighbour yn ddoniol ac yn arswydus - fy hoff gyfuniad i. Mae’n siarad am faterion sy’n effeithio’n uniongyrchol ar lawer o gymunedau yng Nghymru ac mae ganddi gymaint o galon. Rydw i’n angerddol am ysgrifennu newydd a lleisiau newydd ar ein llwyfannau ni, dyma ddrama gyntaf Lucie ac mae hi wedi’i saernïo’n hyfryd ac yn ddifyr. Mae y Torch wrth ei bodd yn gweithio ar y cyd â Theatr Clwyd i ddod â’r ddrama yma’n fyw ac rydw i’n edrych ymlaen yn fawr at ei rhannu gyda chynulleidfaoedd yn yr Wyddgrug ac yn Aberdaugleddau.Dywedodd Chelsey Gillard.
Bydd Constellations (10 Mai-25 Mai), sioe hynod lwyddiannus yn rhyngwladol Nick Payne sydd wedi ennill sawl gwobr, yn cael ei hailddychmygu ar gyfer Cymru fodern gan y Cyfarwyddwr Cyswllt Daniel Lloyd. Mae gwenynwr a ffisegydd yn cyfarfod mewn barbeciw. Mae hi'n meddwl am fecaneg cwantwm, theori llinynnau ac amryfalau. Mae o'n meddwl am ei wenyn, ei fêl ac ecoleg. Mae amser a marwolaeth yn eu herbyn. Oes posib iddyn nhw syrthio mewn cariad byth?
Cyflwynir Constellations mewn dau chwaer gynhyrchiad – un yn y Saesneg gwreiddiol a’r llall yn cael ei chyflwyno am y tro cyntaf erioed yn yr iaith Gymraeg, wedi’i chyfieithu gan Gwawr Loader o dan y teitl Cytserau (7-8 Mehefin). Fel rhaglenni teledu poblogaidd y Gwyll ac Un Bore Mercher, bydd y ddau fersiwn yn cael eu perfformio gan yr un cast.
Rydw i’n falch iawn o fod yn cyfarwyddo Constellations/ Cytserau. Mae’r stori oesol yn gofyn cwestiynau anferth am fodolaeth dyn ac yn cael ei hadrodd am yn ôl, ymlaen ac i’r ochr gyda strwythur disglair o wreiddiol. Rydyn ni’n dilyn ein darpar gariadon ar draws llawer o fydysawdau amgen, lle mae eu dewisiadau’n arwain at rai mân ganlyniadau ond weithiau, canlyniadau seismig. Fel bod dynol dwyieithog sy'n bodoli o fewn dau ddiwylliant, rydw i'n aml yn teimlo fy mod i’n pontio sawl bydysawd! Cymraeg a Saesneg – English and Welsh… Mae cyflwyno’r ddrama yma mewn dwy iaith yn gyfle i ni archwilio’r teimlad hwnnw’n ddyfnach mewn cynhyrchiad i gynulleidfaoedd Cymraeg a Saesneg eu hiaith.Dywedodd Daniel Lloyd.
Mae Rope(29 Mehefin-20 Gorffennaf) gan Patick Hamilton (Gaslight, Hangover Square) yn gomedi dywyll, iasol sydd wedi'i hysbrydoli gan wir drosedd. Mae dau ddyn ifanc di-ofn, trahaus ac wedi diflasu wedi lladd cydfyfyriwr ac wedi cuddio ei gorff mewn cist. Yn y dirgelwch llofruddiaeth yma sy’n cael ei gyflwyno i'r gwrthwyneb, mae parti ar gyfer teulu diniwed y dioddefwr yn datblygu mewn ffyrdd na allai’r llofruddwyr ifanc fod fyth wedi'i ragweld hyd yn oed. Cyfarwyddwyd gan Gyfarwyddwr Artistig Cyswllt Theatr Clwyd, Francesca Goodridge (A Pretty Shitty Love).
Pan wnes i ddarllen Rope am y tro cyntaf, roeddwn i’n gofyn sut cafodd y stori yma am haerllugrwydd y dosbarth sy’n rheoli a dynion yn dianc rhag cael eu cosbi ei hysgrifennu yn y 1920au, pan mae'n siarad mor glir gyda'r 2020au. Wedi'i hysgrifennu ganrif cyn yr obsesiwn heddiw â phodlediadau, mae Rope yn parhau i fod yn sioe gyffro syfrdanol - heb unrhyw seibiau. Mae’r ddrama’n mynd â chynulleidfaoedd ar noson wyllt o ansicrwydd a syndod, gyda ffocws di-baid ar un gofod, un drosedd, a chelu haerllug gan ddynion sydd wedi meddwi ar feddwl eu bod yn well na phawb arall.Dywedodd Francesca Goodridge :
Bydd hwyl i’r teulu yn mynd ar daith y tymor hwn i Gaffi Isa hyfryd Mynydd Isa. Hwyl am bris isel i’r teulu yn cynnwys perfformiad natur rhyngweithiol Cymraeg Ble Mae’r Dail Yn Hedfan (9 Maw); Shakespeare i'r teulu cyfan mewn perfformiad dwbl o Macbeth a Romeo & Juliet (6 Ebr); cyfle i greu rhywbeth o ddim ond darn o bapur yn y sioe ryngweithiol Club Origami (4 Mai) ac yn olaf sioe gerdd i'r teulu cyfan yn Jack! (11 Mai).
Ni fydd pobl sy’n hoff o ddirgelwch llofruddiaeth eisiau colli Locomotive for Murder: The Improvised Whodunnit (12-16 Mawrth). Gan ddefnyddio straeon ac awgrymiadau’r gynulleidfa, gwyliwch y cwmni Pinch Punch yn creu whodunnit unigryw, un-o-fath, na chaiff ei ailadrodd byth. Os ydych chi'n hoffi comedi neu ddirgelion llofruddiaeth, yna dyma'r sioe i chi!
Mae’r sioe gerdd oesol Oh What A Lovely War (23-27 Ebrill) yn gipolwg doniol, ond torcalonnus, ar fywyd i’r rhai sy’n cael eu dal yng nghanol gwrthdaro. Mae’n dod â ffolineb, ffars, a thrasiedi’r Rhyfel Byd Cyntaf yn fyw.
Peidiwch â cholli’r nosweithiau hyfryd yma o adrodd straeon, dim ond yn Theatr Clwyd am un neu ddau o berfformiadau. Mae Medusa yn cyflwyno ei fersiwn hi o’r Rhyfel Trojan yn Beautiful Evil Things (7-8 Mawrth), darn corfforol egni uchel yn llawn ffraethineb. Bydd Joe Sellman-Leava yn cyflwyno Fanboy sy’n llawn hiraeth (15 Gorff), sioe am ei berthynas caru a chasáu gyda’r diwylliant pop. Does dim posib cael haf heb Shakespeare, felly ymunwch â 440 Theatre am ddwy gomedi haf mewn dim ond 40 munud yr un, yn cael eu perfformio gan 4 actor yn A Midsummer Night’s Dream + Twelfth Night (14 Gorff). Camwch i fyd miniog o graff bwyd, teulu a thlodi modern yn How To Feed a Town (23 Gorff) drama wedi’i dylanwadu’n uniongyrchol a thrigolion Sir y Fflint arni.
Ni fydd ein cynulleidfaoedd Cymraeg eisiau colli Ie Ie Ie (6 Maw), addasiad newydd gan Theatr Genedlaethol Cymru am brofiadau byw pobl ifanc sy’n codi cwestiynau hanfodol am berthnasoedd iach, chwant, a chydsyniad. Mae’r sioe yn cael ei chyfarwyddo gan Juliette Manon sydd ar Gynllun Cyfarwyddwyr Dan Hyfforddiant Ymddiriedolaeth Carne Theatr Clwyd.
Bydd y bardd arobryn Lemn Sissay yn ymweld am un noson yn unig (9 Mawrth), ac daw’r bardd Inua Ellams â’i sioe newydd Search Party yma (8 Gorff), sioe fyrfyfyr yn seiliedig ar awgrymiadau’r gynulleidfa.
Bydd cerddoriaeth glasurol anhygoel y tymor yma gan gynnwys y Skampa Quartet (19 Tach), Charlotte Spruit (21 Mai), y feiolinydd, a’r Adelphi Quartet (4 Gorffennaf) o Salzburg.
Mae’r rapiwr o ogledd Cymru, Sage Todz (20 Mai) yn camu i lwyfan Theatr Clwyd ar ôl digwyddiad hynod lwyddiannus gyda Grandmaster Flash yn Neuadd William Aston.
Ac yn olaf, mae comedi i bawb yn Theatr Clwyd gyda’r Clwb Comedi misol (3 Maw/14 Ebr/15 Mai/ 3 Meh/ 7 Gorff). Gyda thocynnau’n dechrau am ddim ond £10, peidiwch â cholli’r cyfle.
Daw Ria Lina â’i sioe am ysgariad a chanlyn yn ei sioe Riawakening (27 Chwe). Hefyd daw dwy sioe o Gaeredin gan ddigrifwyr mwyaf cyffrous Cymru Priya Hall a Leila Navabi i Theatr Mix (7 Ebr).
A chofiwch bod mwy fyth ar gael draw yn Neuadd William Aston. Gyda chomedïwyr o fri fel Stewart Lee (4 Chwefror), Frankie Boyle (3 Mawrth), Tom Davis (5 Mai) a Paul Smith (7 Mehefin), mae’r flwyddyn nesaf yn edrych yn gyffrous iawn yn barod!
Mae aelodau’n cael blaenoriaeth wrth archebu lle, ac yn gallu archebu nawr. Mae tocynnau i’r cyhoedd ar werth o 1 Tachwedd ymlaen.
