Rydym yn chwilio am artist neu sefydliad arloesol i greu llwybr treftadaeth rhyngweithiol cyfranogol sy’n tynnu sylw at hanes cyfoethog Theatr Clwyd.

Mae ein hadeilad rhestredig Gradd II 49 o flynyddoedd oed yn cyrraedd camau olaf ei brosiect ailddatblygu cyfalaf trawsnewidiol, ac rydym yn datblygu gosodiad unigryw, parhaol sy’n dathlu ein harwyddocâd pensaernïol a diwylliannol.

Wedi’i gyllido gan Gronfa Dreftadaeth y Loteri Genedlaethol, ein gweledigaeth ni yw creu profiad sy’n cyflawni’r canlynol:

• Denu ymwelwyr drwy adrodd straeon arloesol.
• Tynnu sylw at nodweddion treftadaeth hynod yr adeilad.
• Creu siwrnai hygyrch a hwyliog drwy hanes ein theatr ni.

Rydym wedi cyflogi’r Prif Ymchwilydd Jude Rogers i gasglu straeon am ein nodweddion treftadaeth mewnol unigryw, ac rydym yn chwilio am artist neu sefydliad profiadol i ddatblygu seilwaith technegol y llwybr rhyngweithiol, gan ddefnyddio’r straeon hyn a thystiolaeth hanesyddol. Ein gweledigaeth yw creu profiad naratif deniadol a allai fod yn ddigidol neu’n analog, ac rydym yn agored i syniadau creadigol yn ymwneud â chanllawiau sain a / neu fapio digidol. Yn bwysicach na dim, mae'n rhaid i'r llwybr gael ei ddylunio i sicrhau hygyrchedd i ymwelwyr byddar, anabl a niwrowahanol.

Ein nod ni yn y pen draw yw creu gosodiad am byth sy’n caniatáu i ymwelwyr archwilio a chysylltu’n chwareus â threftadaeth gyfoethog Theatr Clwyd, gan drawsnewid sut mae pobl yn profi ac yn deall hanes nodedig ein hadeilad ni.

Mae dogfen wybodaeth fanwl yn yr adran Adnoddau ar ddiwedd y dudalen.

Sut i Wneud Cais

I gael manylion llawn am y broses ymgeisio, edrychwch ar y ddogfen dendro yn yr adran Adnoddau ar y dudalen we hon.

Mae hwn yn gais dau gam.

Rydym yn annog ceisiadau gan unigolion neu dimau dwyieithog, yn enwedig y rhai sy’n siarad Cymraeg fel iaith gyntaf. Mae croeso i gynigion sy’n archwilio adrodd straeon creadigol yn y Gymraeg, yn Saesneg ac yn Iaith Arwyddion Prydain, neu ieithoedd lleiafrifol eraill yng Nghymru. Mae'n rhaid i'r prosiect terfynol gael ei gyflwyno yn y Gymraeg ac yn Saesneg, gyda Theatr Clwyd yn cynnig cefnogaeth ar gyfer darpariaeth ddwyieithog os oes angen.

Rydym hefyd yn croesawu ceisiadau ar y cyd gan artistiaid a / neu sefydliadau sy’n cyfrannu sgiliau amrywiol ac sydd eisiau cydweithredu efallai.

Unrhyw Gwestiynau?

Ymunwch â’n Sesiwn Holi ac Ateb ni ar-lein ar ddydd Gwener, 7fed Chwefror 2025, 11:30–12:30, gyda’n Prif Weithredwr, ein Cyfarwyddwr Cyllid, Gweithrediadau a Phobl, a’n Cynhyrchydd. I fynychu, e-bostiwch sam.longville@theatrclwyd.com am y ddolen.

Cam Un: Mynegi Diddordeb (Dyddiad Cau: 21ain Chwefror 2025, 17:00)

Bydd artistiaid a sefydliadau’n cael eu rhoi ar y rhestr fer yn seiliedig ar fynegi diddordeb, gwaith blaenorol, ac ymateb cychwynnol i’r briff gan y Prif Ymchwilydd Jude Rogers, a Chyfarwyddwr Ymgyrch Cyfalaf Theatr Clwyd a Chynhyrchydd y prosiect.

Gwnewch gais drwy anfon y dogfennau canlynol at sam.longville@theatrclwyd.com:

Rhaid i'r llinell bwnc gynnwys: COMISIWN LLWYBR NLHF THEATR CLWYD

• Datganiad o ddiddordeb 2 dudalen (neu fideo 2 funud) yn egluro eich addasrwydd.
• Enghreifftiau diweddar o'ch gwaith (PDF).
• CV neu ddolen i'ch gwefan (uchafswm o 2 dudalen).
• Manylion cyswllt dau ganolwr (gydag o leiaf un yn gyfarwydd â'ch ymarfer).
• Eich manylion cyswllt (rhif ffôn ac e-bost).

Cofiwch: Ni ddylai’r ffeiliau fod yn fwy na 6MB.

Cam Dau: Datblygu Cysyniad

Bydd yr artistiaid / sefydliadau sydd ar y rhestr fer yn paratoi cysyniad i’w gyflwyno i banel sy’n cynnwys ein Prif Weithredwr, ein Cyfarwyddwr Cyllid, ein Hymchwilydd Arweiniol, a’n Cynhyrchydd. Bydd pob ymgeisydd sydd ar y rhestr fer yn derbyn £400 i ddatblygu eu cysyniad.

Bydd y cyflwyniadau’n cael eu cynnal ar ddydd Iau, 27ain Mawrth 2025. Bydd costau teithio’n cael eu talu. Rhowch wybod i ni am unrhyw ofynion penodol ar ôl cyrraedd y rhestr fer.

Meini Prawf Asesu

• Dealltwriaeth o friff y comisiwn.
• Ansawdd a pherthnasedd gwaith blaenorol.
• Creadigrwydd a sgiliau cyfathrebu.
• Tystiolaeth o hawl i weithio yn y DU.

Adnoddau